入境處處長白韞六於08年曾透露香港奧運馬術比賽期間有可能受到恐怖襲擊，但即時遭老頂保安局局長李少光同其他政府高官強烈否認，近日維基解密披露，當時的確有情報顯示香港有機會受到恐怖襲擊，為硬啃死貓嘅白韞六大平反。
白Sir噚日主持入境處記者會，有記者問白Sir對維基解密幫佢平反有乜嘢回應，白Sir唔公開感謝恩公阿桑奇，只係話李少光局長早前已經在立法會詳細回答呢方面問題，佢冇補充。有記者追問佢會唔會批准王丹來港弔唁華叔，白Sir再以李少光做擋箭牌，指局長在立法會已回答，佢亦冇補充。白Sir今年退休，唔想臨尾出事，難怪咁小心。