滙控（005）繼續領軍，噚日帶動港股再升113點，但係就出現先高後低嘅陰燭走勢，港股好明顯出現沽壓。
從技術走勢睇，長和同地產股要唞氣係正常發展，但短線下調空間唔會好大，內地金融股接力頂住個市，港股暫時應該守得住24000關。正股上升股數係496隻，下跌股數653隻，反映唔少股民對後市有戒心，趁機沽貨，24800至25000的確阻力唔細，港股會喺24000至25000之間上落。
建行C輪25825：建設銀行（939）報收7.30元，升1.3%。股價前日突破位處7.15元嘅50日線，噚日繼續攀升，成交大增，尾段隨大市回落，升幅收窄，整固吓應該會向7.75至8元區域推進，可以諗吓隻C輪25825。
隻輪現價50仙，2011年4月20日到期，行使價7.274元，溢價6.3%，引伸波幅31.1%，槓桿率15.1倍（有效8.2倍），正股升上8元，25825睇97.1仙，升幅超過9成，如果正股跌穿7.10元就沽咗隻輪。
俊樺