高盛舊年捲入「欺詐門」事件，CEO布蘭克費恩（圖）即時成為箭靶，要佢落台之聲從來冇停過，最後使咗成5.5億美金（約42.9億港紙）達成庭外和解，先叫暫時甩難。
布蘭克費恩唔肯起身，惟有整份改革報告，誓神劈願話會洗心革面重新做人，點知，繼續俾班美國眾議院嘅議員咬住佢唔放！
班政客話，諗住喺今個月尾出份關於金融海嘯嘅報告，力數高盛點樣搵啲客笨，兼且乘機向美國證監會（SEC）施壓，迫使SEC重新展開對高盛嘅調查。都係嘅，有好多嘢，唔能夠淨係講聲我知錯就逍遙法外，更何況，咁多人唔見咁多錢，點都應該查清楚啲！