美斯贏金球獎後，惹嚟唔少抨擊，咁仲唔止，佢外公日前更踢爆球王已經同女朋友安東莉娜分手。若果外公唔係亂噏，美斯心情靚極有譜，枉佢連日嚟喺公開場合不斷臉泛笑意，唔通係對人歡笑，背人垂淚？
外公：冇女友都可享受人生
美斯禮拜一以半爆冷姿態贏得金球獎，頒獎禮後隨大軍坐專機返歸，佢都好識做，喺飛機上受訪時讚沙維、恩尼斯達，互相祝福，點睇都唔似因為選舉結果而感到尷尬，或者影響到手足之情；再睇佢同一眾巴塞隆拿隊友舉杯個樣，心情靚絕喎！
不過，球王心事誰可知？佢外公古斯天尼日前受訪時就大爆個孫甩拖：「佢家並冇女朋友，佢之前有嘅，但分咗手。咁都幾好，佢仲咁後生，我成日同佢講只要生活得健康，一樣可以享受人生。」
此話一出，異常震撼，皆因佢同女友安東莉娜之前一直打得火熱，上年夏天幾次俾人影到一齊食燭光晚餐、一齊享受陽光與海灘，不知幾恩愛，當時仲傳過兩個好快拉埋天窗㖭。邊有人估到好似佢外公所講，美斯同女友家吓已經情海翻波。我求大俠一直覺得佢兩個好襯，希望甩拖唔係真，只係老人家搞錯，又或者係佢兩個耍花槍啫。
講番金球獎，西班牙人沙維、恩尼斯達都冇份，而領軍贏世界盃嘅迪保斯基都輸畀摩連奴，攞唔到最佳教練，西班牙人當然㷫，傳媒繼續炮轟選舉不公。咁仲唔止，關於選舉陰暗面繼續浮上面，繼國足教練高洪波、隊長杜威話交畀人代選後，危地馬拉隊長卡比拉仲搞笑，佢話明明填咗頭3名係科蘭、卡斯拿斯同埋沙維，但唔知點解沙維嘅選擇變成沙比阿朗素。咁都得？
曾偉忠投訴「揀錯人」
有份投票嘅港隊教練曾偉忠證實，佢嘅金球獎選擇順序係沙維、佩奧爾及卡斯拿斯，同國際足協公佈嘅選擇有異，除首、次選一樣外，但第3選被更改為拜仁慕尼黑嘅拿姆。至於港隊隊長李海強嘅首選恩尼斯達，亦被改為巴塞隆拿前鋒韋拿。