西九管理局行政總裁謝卓飛返工唔夠五個月就以健康理由辭職，證明呢個位真係唔易坐。不過，情緒困擾、失眠問題只係病徵，好多打工仔都有呢啲情況，因此謝卓飛起身內情肯定唔係咁簡單，有官場中人分析其「病因」，為佢斷症。
履歷靚爆但低估壓力
謝卓飛做過英國巴比肯中心藝術總監，曾任BBC高級監製，本身又係藝術家，掌舵西九唔怕外行人領導內行人，因此上任時各界都認為請到呢位過江龍真係深慶得人。不過有高官指謝卓飛履歷表固然靚爆，然而接受聘請來港前，可能想像唔到做西九「一哥」面對嘅壓力，而西九行政總裁要經常面對公眾、本地藝團、議員以至傳媒嘅質詢，呢啲場面，相信謝卓飛以前遇見機會唔多。
高官又稱據佢所知，謝卓飛每次公開發言前都十分緊張，甚至可以用驚恐（panic）嚟形容，因此得悉謝卓飛遞信，雖然覺得意外，卻唔感到訝異；最意外係謝卓飛竟然唔現身交代辭職理由。西九管理局已開始全球獵頭再搵新CEO，官場流傳一個說法，就係西九主席、政務司司長唐英年要再全球招聘新行政總裁之前，應該先搵另一間獵頭公司，或者自己親身上陣獵頭，慳番筆薦人費，否則再請個快閃CEO，恐怕被市民質疑係枉花公帑做水魚就弊。
要職一般有替補條款
實情獵頭公司都係按客戶要求點將，最終請邊個人都係客戶話事，要求獵頭公司「包生仔」不太公道，八方請教獵頭行業人士，據知物色如此高薪職位，收費一般係職位年薪兩至三成，以謝卓飛年薪約350萬元計，即係收100萬元左右，行內人指唔好以為好貴，因為環球招聘隨時要做半年，有時更要搭飛機去游說心水人選，絕對唔係坐喺度收信咁輕鬆。獵頭行內人又指，遴選重要職位一般有替補條款，即係若受聘人上任不足三個月至半年就唔撈，獵頭公司要再物色新人選，第二次獵頭不額外收費，搵到啱為止囉。
mailto:[email protected]