年關將至，八方噚日收到行內好消息，《南早》揸fit人、太子女郭惠光宣佈月底前派花紅，金額個別通知。《南早》中人透露，下星期先知道花紅具體金額，估計約一個月人工，唔會令人太失望，但亦唔預期有驚喜。
《南早》行家唔敢有太高期望，係因為公司舊年冇派花紅，據講係歷來首次，就算03年沙士，市道差到喊晒口，翌年都有花紅分，但現時揸fit人比較克制，因此唔預期會豪爽派花紅。
《南早》噚日同時宣佈人事變動，廣告部一姐張凱詩Elsie會升任營運總監COO，據講除咗照舊睇實廣告部外，仲會負責全公司日常運作，編採部門除外。而去年中先入《南早》負責開發iPad版嘅EtienneMaccario則會升做數碼業務發展總監，內部相信會進一步發展網上新聞。