陳奕迅約滿後，成為各大唱片公司爭奪目標，有傳身價已去到5億元。徐濠縈昨日在金鐘出席活動時，對老公億元身價表示不知情，心痛老公辛苦搵血汗錢，揚言家用免加，可以自給自足，不過造人大計就要繼續押後。
意國名牌Fendi昨日在金鐘舉行2011春夏時裝騷，徐濠縈、謝婷婷、姚予晴和陳貝兒等，一律以單薄的春夏新裝出現捧場，幾度寒風吹襲下，眾女郎都有點冷到震。
開心最重要
徐濠縈穿着及膝裙，她說：「今日要捱凍，噚日去咗修腳，上身着fur，下身人字拖，扮靚背後要捱凍同肚餓。」老公陳奕迅（Eason）近期成為各大唱片爭奪對象，有傳身價已升到5億元，徐濠縈則說：「呢啲係辛苦錢，聽到都知辛苦，受人錢財，還番血汗同努力，現階段佢開心係最重要。」
問到是否有5億元？徐濠縈說：「唔知，實質都冇過問。一分耕耘，一分收穫，呢樣等佢另一個媽咪（指陳家瑛）負責啦。」老公億億身價，豈非可以加家用？她說：「呢啲係佢血汗錢，唔使加家用，我唔想佢咁辛苦，時裝舖嘅收入都好穩定，可以自給自足，冇咁辛苦。」
「我仲可以等」
徐濠縈一直想追多個，造人大計現時豈非要押後？她說：「係呀，因為佢會越來越忙，OK啦，我都仲可以等吓先，關係環境因素，我咪湊住呢個女先。」
謝婷婷身穿白色trenchcoat，她謂小時候同學對爸爸謝賢的白西裝印象最深，她說：「爹哋好鍾意着白色西裝，媽咪就着湖水藍套裝，中學放學時，好易認到佢哋。」她透露感情最好的中學同學，年中在加拿大結婚，她會放假返去做姊妹，她更開心指之前介紹男友安志杰給好友們認識，獲一致好評。
採訪：RitaLeung
攝影：WongManWai
