當基本因素唔會日日更新，炒家挾巨資入市，掠水竅門離不開中國商人最擅長嘅手法──囤積居奇炒供求。運用得出神入化，財富隨時可以幾何級數增長。撇開感情因素，股票同蒜頭、辣椒、薑、奶粉都一樣淪為炒供求嘅商品。早前市場傳出摩根大通控制晒全球八成嘅現貨銅，銅價即借消息發癲，12月升超過10%兼創新高後，開年至今唔見近4%，證明有呢類消息傳出，多數代表價格見頂，去年7月可可豆期貨見頂前，同樣出現過類似消息，話倫敦對冲基金Armajaro商品交易員係歐洲可可豆庫存被搶購一空嘅幕後黑手，囤積量大到可以左右市價。橋唔怕舊，以後見同類消息一出，每每就係見頂先兆。
有剛為人父嘅中資券商朋友話，坊間嘅美贊臣同美素佳兒奶粉賣斷市，聽講呢兩隻係最受內地媽媽歡迎嘅奶粉，有龐大Demand，唔怪得11月初寫過嘅MJN上月中創晒新高升破61美元，當時提及生產奶粉必備嘅DHA生產商MATK，原來股價都升到上31美元，兩個月升足34%，睇嚟呢位新爹哋真係要諗諗點樣對冲奶粉錢。
奶粉的士牌乜都炒
佢仲收到相熟藥房嘅消息，話有人用咗成億銀喺上水租咗個貨倉囤積奶粉喎。根據罐裝BB奶粉由製造日至到期日足足有兩年，炒家係有足夠時間趁下一批奶粉登場前，再一邊收集將市場貨源歸邊，製造供求失衡，再進行提價散貨行動大發BB財。
都係熱錢惹的禍，既然錢搵錢咁易，大家信唔信溫州人會攞資金嚟香港做實業？就算唔准炒股炒樓，市場仲有大把嘢炒，話唔定下次來港搶的士牌，早排有個炒到上450萬元嘅的士牌，有說資金來自大陸，仲費事煩冇租出去賺錢，升值當然好，唔升都無所謂，總之供求因素足以保證牌價，關鍵係最緊要有個價，尤其係市場公價。
呢幾日股輪齊發有如雙龍出海，離唔開錢作怪，只係大戶興風作浪手法同奶粉的士牌原來如出一轍，欲知詳情，明天請早。
胡孟青
獨立股評人