特首煲呔似乎對BBQ情有獨鍾，家僕呼朋喚友喺禮賓府搞BBQ派對，佢自己就不時請人到特首粉嶺別墅燒嘢食，近日邀請建制派議員本月22日到粉嶺BBQ，有人話呢餐係要多謝建制派響應起錨支持政改，亦有人指因為建制派曾請特首出席圈內飯局，呢次回請純粹禮尚往來，「冇特別原因」。
阿Sir請食飯都唔係個個議員領情，口硬反對政府申亞卻轉軚、否決立法會調查八達通嘅工聯會王國興，表明冇興趣去BBQ，揚言寧願落區幫街坊寫揮春，又笑指民記同政府就申亞反面，「當日應該唔使起火，都已經熱辣辣」。
唔准攜眷出席
民記葉國謙就指煲呔顯然係整蠱議員，因為去年中去粉嶺別墅BBQ時高溫30幾度，對住個火爐幾乎熱到中暑，今次就選擇嚴寒日子請大家去食風。有獲邀議員稱曾要求攜眷出席，不過禮賓府方面sayno，唔知點解咁多限制。
有份撐政改嘅白鴿黨冇份BBQ，該黨黃成智稱冇收過邀請，酸葡萄咁話同煲呔食飯好平常：「如果佢請，有得食點解唔食？」