林保怡月前獲得「2010亞洲區電視大獎」最佳戲劇節目男主角獎，凱旋之日無綫冇人接機，保怡昨日才在祝捷會上從陳志雲手中取得獎座，志雲補鑊說：「公司冇待薄你！」保怡回應說：「遲到好過冇到。」談到年中約滿無綫，保怡表示不會談任何附帶條件，續約最緊要講錢。
無綫昨日在將軍澳電視廣播城舉行節目揚威國際祝捷儀式，並由無綫總經理陳志雲頒發20多個獎項，除了劇集獲獎外，不少時事節目亦獲得殊榮。
「遲到好過冇到」
林保怡早前在新加坡榮登亞洲視帝寶座，而謝雪心則獲最佳女配角獎，林保怡凱旋回歸當日，無綫沒有安排接機慶功，他曾有感而發，自覺不受公司重視，昨日終獲陳志雲親自安撫，志雲一踏上台便解釋：「公司冇待薄你林保怡，因為要等獎返晒嚟，每年都喺呢個時間舉行，希望你明白。」
連續兩屆榮登視帝寶座的黎耀祥，昨日亦有到場祝捷，黎耀祥憑《巾幗梟雄》中演繹柴九一角，在紐約電影電視節獲最佳角色演繹組別優異獎，十分威水，祥仔和林保怡兩位視帝碰頭，被問到哪位視帝稱霸，二人不約而同說：「我哋唔講呢啲。」
至於志雲公開呵護保怡，保怡勉為其難說：「遲到好過冇到，冇待薄我，係報紙寫之嘛。」保怡年中和無綫約滿，他承認正與公司洽談中，但絕對不會有任何交換條件，還說：「我最緊要係錢，但好難開口講。」問到他是否想加到視帝價，保怡直言：「好，加錢又有自由度就得，詳細都要拍完手頭上劇先再傾，我諗要照香港現時通脹去加。」
「想去日本拍劇」
成為亞洲視帝後，保怡希望繼續衝出香港，特別想去日本拍劇，還笑言：「日圓好貴，最好可以過去包食包住，叫樂小姐安排一下。」
志雲則否認專登呵護保怡，他說：「佢都冇受傷，唔需要呵護，保怡好明白事理，可能佢未必知道呢個獎以往都係一月舉行。」
採訪、攝影：卓寶花
