近排打機興上人身，PSP隻《TheThirdBirthday》飛嚟飛去搵替身好過癮，嚟緊家用機又有一隻《MindJack》玩心靈入侵；呢隻Game擺明玩駭客元素，不過就唔係Hack入人哋部電腦，而係Hack入人哋個腦！
文：阿洛
心靈反恐戰
射擊遊戲唔係玩異形就玩過去未來，呢隻都唔例外，講緊嘅係西元2031年，喺呢個未來高科技世界出現咗一班可以Hack入人哋身體嘅人體駭客，而有呢種能力嘅當然有好有壞，主角就係好人一方嘅FIA聯邦諜報局特務JIM，同埋反乜反物組織靚女Rebecca，目標好明確，就係阻止心靈上嘅恐怖襲擊。
行家親家認唔清
講到頂癮之處，就係隻Game玩埋現實網絡，只要將遊戲機連接網絡，就可以心靈入侵其他「在線玩家」；同一時間下，最多要面對6名其他玩家Hack入閣下遊戲世界。
作為入侵者，可選擇幫主角定反主角，即係你打打吓機，隨時敵人會由電腦NPC，變成其他在線玩家，同時間又有可能有老友記上網幫你拖；身邊市民隨時「鬼」上身偷襲你，又有可能會突然幫你清卡數、擋子彈！增加難度之餘，邊個係朋友邊個係親家，都好難話得埋！
機械怪物照上身
入侵無界限，可以使用街道上任何人物或敵方身體，甚至係機械或者其他合成生物都可以操控，而隨住操控對象唔同，攻擊能力及方法都會有唔同。自閉仔女唔想同人有聯繫，可以熄咗個網上入侵功能；同樣如果想玩分隊對戰、大亂鬥都有線上模式可以玩。
Profile《MindJack》
主機：PS3、XB360
類型：射擊
廠商：SquareEnix
推出日期：1月27日
