聯合國兒童基金會unicef過去25年一直喺香港籌錢，提倡兒童權利保護、幫助兒童達到基本需要，今年起卻首度撥款300萬元資助本地非牟利機構推廣兒童發展及權利，錢唔多，意義卻大。
2月28日截止申請
unicef使命係幫助發展中國家兒童，最關注受戰爭影響三餐不繼、飢寒交迫第三世界小朋友，香港滿街名車、豪宅癲價，港孩飯來張口，衣來伸手，點解要unicef接濟？委員紀文鳳同八方講，咪以為香港真係「已發展地區」，其實好多兒童活在貧窮線下，父母為口奔馳疏忽照顧子女，少數族裔兒童被歧視。
為幫忙香港兒童，unicef未來兩年每年會撥款150萬港元，資助三個合資格非牟利團體推廣有關兒童生存、受保護、參與、發展權利嘅工作，每個項目最多獲50萬元資助，由社聯行政總裁方敏生、中大校長沈祖堯等人評審，2月28日截止申請。
關愛基金搶食善款，紀文鳳稱託賴unicef財政穩健，每年在香港籌到約1億元，08年金融海嘯都有2.4億元善款，因為四川地震，港人踴躍捐輸，當中1.4億元捐到四川。