「我沒有6呎高，我卻會待你好~~」。本地娛樂圈有祖藍成功「高攀」高佢6吋嘅亞男，外國呢？就喺意甲，現正上演緊「長短腳之戀」嘅主角，就係祖雲達斯嘅意大利前鋒加利亞雷拉，同埋意國女排之花維朗妮嘉嘞！
矮女友8厘米變矮仔
加利亞雷拉喺1月初不敵帕爾馬嘅意甲聯之中重創，膝頭哥嘅十字韌帶撕裂，要提早收「咧」。不過，所謂球場失意，情場得意，加利亞雷拉可以集中火力，力追意大利高妹維朗妮嘉。加利亞雷拉身高有1米80，雖然冇6呎高，但都算身材中等，不過，由於佢鍾情於擁有1米88身高嘅維朗妮嘉，所以做矮仔都冇計囉。
喺1986年出生嘅維朗妮嘉，除咗擁有1米88嘅身高之外，仲有一頭金髮兼樣靚身材正，不過，佢並唔係模特兒或者電視台姐仔，而係意大利女排運動員，仲成功入選國家隊，位置係主攻手；由於佢樣貌出眾，仲有「意國女排之花」，同埋「天使」等稱號。據意大利《新聞2000》透露，加利亞雷拉喺一個偶然嘅機會下認識咗維朗妮嘉後，即刻生滋貓入眼，並且立即發動攻勢。
鮮花燭光晚餐輪流轟炸
加利亞雷拉已經追咗呢位排球美女長達幾個月，期間不時以短信傳情，又鮮花轟炸、約會同埋燭光晚餐呢幾招輪流使用，令到初時表現冷淡嘅維朗妮嘉，最近都開始變得欲拒還迎。
既然家加利亞雷拉有得唞吓，大把時間諗吓點樣畀驚喜維朗妮嘉；雖然拖住隻「天殘腳」，喺拍拖時可能會有啲唔方便，但話唔定咁樣仲可以激起維朗妮嘉嘅母性，等女方由憐生愛呢！既然祖藍矮過亞男6吋，都成功追到佢，加利亞雷拉不過矮維朗妮嘉3吋幾啫，我求大俠睇好你o架！