港大今年創校100周年，噚日請咗86年至95年做校長嘅歷史學家王賡武教授開講座，揭港大創校因由，有百多名港大教職員同校友出席。
現年80歲嘅王教授喺東南亞高等教育界地位舉足輕重，對於教育局力推私立大學，佢坦言唔睇好，指好多私大只係高等教育機構，唔係真正培育人才嘅大學，美國長春藤大學如哈佛、耶魯等，因為創立時冇公立大學，所以攞到好多社會資源同捐款，百年下來富可敵國，目前香港已有多間公立大學，私大缺乏資源，好難在學術研究上有貢獻。
港大醫學院命名權起風波，前校長王教授話為咗應付學生增加同保障質素，社會又出唔起代價，呢啲事無可避免。現場有人問王教授有乜忠告畀校長徐立之，佢叫徐校長唔好偏聽，多啲諮詢。