港股連跌兩日，噚日又掉頭回升，恒指升上23760收市，升幅233點，成交縮咗，不過恒指成份股嘅成交量就增加，市場焦點係乜嘢股份已經好清楚。
上落市格局未變，但10日線上破50日線現黃金交叉係新嘅利好訊號，早幾日恒指嘅高位喺23861，如果升破呢個位收市，入市嘅技術買盤應該會多啲。
滙豐控股（005）完成調整，繼續上試阻力，長和系強勢會繼續維持，地產股都係支撐大市嘅主力。
信置C輪24878：信和置業（083）噚日報收16.18元，升3.2%。股價喺50日線關前徘徊3日終現突破，有力突破16.40元再向18元推進，可以諗吓隻C輪24878，隻輪現價13.6仙，2011年6月15日到期，行使價17元，溢價13.5%，引伸波幅40.9%，槓桿率11.9倍（有效5.6倍），正股升上18元，24878睇23.9仙，升幅有七成半，算係幾吸引，正股條100日線收15.60元左近，跌穿呢個位就沽咗隻輪止蝕。
俊樺