自由黨田少復出，噚晚落區第一擊去沙田派叉燒飯畀長者，碰啱氣溫驟跌，真係粒粒暖意在心頭。派飯呢條橋由該黨沙田區議員梁志偉度出嚟，情商做食肆嘅老友贊助600個叉燒飯連例湯，噚晚第一次派出170個飯，稍後陸續有來，估計要花10,000蚊。
田少係識食之一，對噚晚嘅叉燒飯冇意見，相信食得過。大手筆派飯，梗係同重出江湖有關，田少承認同黨主席劉健儀正考慮直選新界東及港島，新界西則讓路畀細佬田北辰。佢又透露民調顯示自由黨第二梯隊知名度「好唔掂」，稍後要設法補救，又指葉劉新民黨唔係競爭對手，因為路線唔同，自由黨同公民黨更易硬碰硬，因為都係爭中產票。