農曆年宵月底開鑼，各大政黨一般會喺全港最大年宵市場維園擺檔做宣傳，民建聯今年唔落腳維園，西進荃灣沙嘴道遊樂場開檔，官方解釋係要方便街坊，地區性年宵更有親切感。八方思疑與去年件禮義廉T恤在維園年宵熱賣有關，民建聯當時嬲到要海關去社民連攤檔掃場沒收件衫，不過海關最終冇作出起訴；為免今年再被玩殘，民建聯避走都好明智。
社民連繼續在維園吸金，今年主題係劉曉波，會印製空凳Tee出售，又想整和平獎牌朱古力，不過製作圓形朱古力比較多工夫，所以可能退而求其次賣方形就算。如果做唔到圓形，八方建議社民連唔好賣，事關形神俱無，冇乜意思，發少啲新年財，冇所謂啦。