新「一哥」曾偉雄噚日早上坐1號座駕去完禮賓府宣誓，估唔到下一站就係去醫院，不過大家唔好以為新一哥頭頭碰着黑，其實佢十分「紅」，佢上位前主動染紅嘅秘聞，係咁嘅……
回歸後98年曾偉雄升做灣仔區指揮官，坐正後經常要出席左派社團宴會，飲宴上不時要高唱愛國歌曲贈興，當時做灣仔助理民政專員嘅季詩傑公事上都要出席呢啲畀面派對，佢憶述曾偉雄唱得有板有眼，好奇之下問相熟警員，原來曾偉雄甫上任就向警民關係科下屬求教學唱熱門愛國歌，即係《我的祖國》、《我的中國心》、《我是中國人》等，以便與地區人士打成一片。阿季稱自此佢對曾偉雄留下深刻印象，對佢深諳為官之道甘拜下風。
修讀中國事務課程
除咗急學愛國歌，曾Sir亦有唔少機會惡補國情，99年去北京清華大學修讀中國事務課程，04年再上京，在國家行政學院修讀進階國家事務研習班，八方相信北京學藝歸來，佢唱忠字歌、跳忠字舞造詣應該與官職同步並進，官銜越大歌藝越加精湛，否則如何坐上一哥呢個位？有個咁交心、咁信得過嘅警務處處長，中聯辦保安絕對不成問題。
如此積極染紅，曾偉雄可以話係特區高官典範，阿季話曾偉雄日後一定會盡力討好西環，遊行示威人士在西環門外面對嘅警力會不斷增加，大家自求多福啦。佢又相信曾偉雄壯志不只於此，想做埋保安局局長㖭呀！
mailto:[email protected]