前日響青衣運動場踢嘅港甲聯賽盃8強戰扯紅旗爆滿下，南華同天水圍飛馬齊齊贏波，而南華足主羅傑承名下嘅「軍事行動」雖未能贏馬，但佢夜晚都忍唔住喺微博話今日好開心，不過今季加盟南華嘅徐德帥就未必笑得出。事關佢前日半場因右腳腳腕受傷，要入醫院檢查，點知足足呆等4個鐘先見到醫生；天寒地凍等成晚，真係幾慘情。
科夫穿頭轉睇私院搞掂
羅傑承一向強調要專業化，但今次徐德帥受傷，下晝5點入咗瑪嘉烈醫院，結果等4個鐘先見到醫生，好明顯就唔係咁專業。咁啱同日飛馬隊長科夫對流浪撞穿頭，流晒血又要入院，結果又係要等3個鐘；但科夫因太痛頂唔順，得到醫院同意即刻轉咗去私家醫院接受治療唔使呆等，縫咗6針先出院。
羅生噚日凌晨喺南華Blog透露，阿帥經初步檢驗後，因被「分流」為非急症，所以要等，最後等到夜晚9點、足足4個鐘頭後先見到醫生；經檢驗後證實冇斷骨，包紮後就離開；羅生仲講笑，話等咁耐唔知可唔可以中途去買飯盒醫肚呢。
做事向來熱心嘅羅生，事後深入了解點解要等咁耐，原來喺球場叫救護車，就會被送到最就近嘅政府醫院，到醫院後按緊急情況被「分流」，如果被介定為唔急就要等；佢覺得唔只球會內部需要討論，喺足總嘅甲組會上，球會代表應該討論吓呢件事，集思廣益，或者會搵到個更好方法保障受傷球員。其實球員受傷不時都有，點先可以令佢哋唔使等餐死？求大俠就請教咗東方總監梁守志，睇吓佢搞波時代遇到比賽時球員受傷點處理。
Peter梁：唔一定去政府醫院
Peter梁就話，就算足總叫咗救護車到場，其實唔一定要去就近嘅政府醫院，因為球會有幫球員買咗保險，保險已經承擔大部份診金，只要球會有要求，就可以送球員去私家醫院，就唔使等咁耐。無論邊個受傷都好，希望下次唔會再等幾個鐘啦！