smartBRABUS 讓子彈飛

smartBRABUS 讓子彈飛

唔好齋睇佢身形細細粒,以為佢好蝦,備有102匹馬力,但車重只有820kg全新2011年版smartBRABUS,踩盡油門飆住去,好玩過唔少辣車!加埋頭尾尖兼圓碌碌的身形,成粒子彈咁周圍飛。想再過癮啲,開埋個軟篷迎風吹,超爽的享受又點可以停!

記者:許維雅
攝影:梁細權
Model:Rika@GME

配備落足料

當平治宣佈新一代smartfortwo到港時,眾人都將焦點落在車價$99,000的超筍pure版,實屬無可厚非。不過馬力只得61匹的入門版,始終適合新手代步。愛享受速度的話,目標當然是新一代smartBRABUS,率先來港讓記者試車的,是價錢最頂級的開篷cabrio款式。
外形方面,依舊有更醒神的Xclusive包裝,全車裝上動感包圍,配襯全新設計的前16吋後17吋BRABUS專用合金輪圈,效果自然比普通版搶眼得多。再加上油缸蓋、波棍頂及輪圈都有BRABUS標記的B字,不論是否覺得辣味有所升級,起碼都感受到落足料的配備。
新一代smart除增加車身及安全車體結構的顏色選擇之外,軟篷亦多了紅色及藍色自由配襯,只可惜試車呢部係黑色軟篷,未有現貨睇,但外形出位的smart又點可以錯過咁Sharp的顏色,車主不妨花啲心思撞出心水顏色。

■真皮桶椅夠晒高,帶來更佳的承托力。

■打開軟篷頂,拆走門頂框更無拘無束。

■車尾門可負重220磅,男士們坐都無問題。

LED日間燈融入平治

我最鍾意的地方,是由霧燈改為一字形的LED日間燈組合,感覺更融入平治大家庭,滿足虛榮心之餘,又可發揮日間行車更安全的實用功能。

■由霧燈換上LED日間燈組合,更似平治家族。

馬力勝pulse版31匹

屬smart御用改裝公司的德國BRABUS,將BRABUS重新調校過1公升引擎,令馬力輸出輕微提升4匹至102匹,比起pulse版多出31匹馬力,車仔頓時變了粒子彈仔,0-100km/h加速只需8.9秒,加上無mhd停車熄引擎技術減低起步的輕微遲緩,踩盡油門帶來超正暢快感,開了篷玩就更爽。代價當然是油耗比pulse版的4.3L/100km增至5.2L/100km,以油價$15/L計算,都是$0.78/公里,依然抵玩!其次是二氧化碳排放量為每公里119克,相對無咁環保。至於車價貴pure版一倍以上,求代步還是求豪華玩樂,閣下自算了。

還記得第一次揸smart的pulse版,誤以為車仔細細好易操控,點知原來軚感、油門及迫力都比較實,好似玩高卡車,男人大叫好玩,有真實操控感。今次再試揸smartBRABUS,不知是否早有心理準備,還是性能及操控有所調節,兩者互相配合下,揸住部長闊高只有2,727×1,752×1,555mm的車仔周圍攝,的確有越揸越過癮的感覺。

■BRABUS版專有的黑底色燈箱添Cool味。

■油缸蓋有一個黑色圓形B字顯身份。

■半圓錶板同樣有BRABUS字樣。

■BRABUS專用胎軨有不錯的地面抓着力。

■音響系統比普通版豪華,可享受立體聲效果。

■波棍頂有BRABUS的B字標記。

BRABUSXclusiveCabrio規格

引擎:999cc直三
馬力:102hp/5,800rpm
扭力:147Nm/2,800rpm
傳動:5前速自動波
售價:$238,000
查詢:34288666(smartHK)

周末周日親身試揸

想試坐呢部全新smartBRABUS,親身感受一下有乜唔同,可於本周末到九龍灣的平治車展參觀。

日期:1月15日至16日
時間:10am-7pm
地點:九龍灣MegaBoxL5