喺香港，隨時「惡魔在身邊」，皆因魔鬼又搞地產又搞超市又搞電訊，最近有九個有志之士化身「驅魔人」，合寫咗本書叫《九評地產黨》，點出咗呢隻「youknowwho」嘅真身。
二樓書店敵不過貴租
書以「打倒地產黨，重建新香港」做賣點，明對抗香港最大勢力。「香港有邊黨大得過呢個？」出版嘅次文化堂社長彭志銘講，作者之一嘅吳志森話，書名靈感源自中共60年代寫過9篇評論蘇聯共產黨文章嘅《九評蘇共》。
八方睇過本書，作者對「地產黨」好唔客氣。馬國明用歌德名著《浮士德》魔鬼定義做比喻，「那種力量不斷想作惡，但卻經常行善」，因為地產商賣樓呃秤，卻成日捐錢（如關愛基金）扮好人。陳雲仲話，「妓院老闆發起全城守貞宣誓大行動，都不及地產商財閥要在香港行善來得好笑」。吳志森話好難怪市民仇富，因為一返屋企就見到個「比床還要大嘅窗台」。
其實班作者都係地產黨嘅受害者。彭志銘、馬國明感嘆二樓書店快變歷史，「啲租咁貴，搬到廿樓都唔掂」。