莊士中國（298）噚日宣佈，委任執行董事莊家彬做副主席，即日生效。莊家彬係邊個可能唔係咁多人識，或者咁介紹，佢就係莊士主席莊紹綏個仔、「名媛」傅明憲（圖）嘅緋聞男友、成日喺娛樂版見到嗰個「富二代」囉！
據莊士嘅通告講，細莊生係喺08年加入公司，持有106.4萬股莊士機構（367）股份，佢嘅董事袍金為兩萬大元。至於細莊生負責啲乜，well，佢以前同記者講過，佢幫阿爸打理屋企嘅地產生意，但係根據資料顯示，除咗舊年8月成功賣出香島道37號D獨立屋，基本上無再喺財經版見過佢嘅蹤影……話時話，細莊生再上一層樓，華華覺得，最值得恭喜嘅應該係傅小姐，無咗海域化工嘅主席老公，家搵到個年輕有為嘅莊士副主席，直頭要開香檳啦！