港澳辦主任王光亞似乎要刻意改變上手廖暉保守作風，噚日喺北京接見23人香港傳媒高層訪問團，展示開明一面，當然《蘋果日報》繼續被禁冇獲邀，亦睇到佢開明到乜嘢程度。
就任兩個幾月，王光亞引用同佢一樣外交部出身嘅前中聯辦主任姜恩柱名句，話香港事務係一本難以讀懂嘅書，仲話對佢嚟講難度更大，所以會好好學習，亦準備喺北京兩會結束後訪問港澳。
訪京團團長陳淑薇話，向王光亞提出希望香港傳媒可以喺開放環境下採訪，亦希望內地資訊更自由，佢冇講收到乜回應，但指王光亞席間澄清，早前講到趙連海一事時話「井水不犯河水」，其實只係指兩地司法互不干預，覺得香港關心內地發展係應該喎，又不點名咁叫傳媒客觀報道。