司徒華畢生貢獻教育事業，由做老師到校長，再成立教協工會。佢1952年喺葛量洪教育學院畢業，係第一屆大師兄，教院由葛師等5間師範院校組成。為悼念摯愛校友離世，香港教育學院首次展出華叔一批從未曝光嘅學歷文件，包括少年華叔15歲時喺廣東開平初中畢業嘅「訓導證書」，同佢嘅測驗卷、劇本手稿，等大家更了解華叔60年來嘅誨學生涯。呢個「懷念司徒華先生特展」噚日開始。
主任評品性和善
當中年代最久遠嘅展品，要追溯到民國34年7月15日，即係1945年，仲係國民黨揸旗嘅年代。當時華叔15歲，啱啱喺廣東開平縣立中學初中畢業。少年華叔係乖乖仔一名，不過成績似乎唔多標青，所以訓導主任贈佢八個字評語：品性和善，仍須奮勉。華叔呢張「訓導證書」有近66年歷史，上面仲有佢當年嘅學生照，剪咗個平頭裝，雙眼好有神。
展品仲有華叔1971年喺香港官立文商專科學校嘅畢業證書，證書列出佢各科成績，以中國文學同歷史最耍家。當時華叔仲係葛師校友會觀塘小學校長，夜晚進修，好學不倦。另一件展品，就係佢進修時嘅文字學測驗卷，華叔考得78分，老師批文讚佢舉例清晰，但就有啲甩漏喎。教院校長張炳良同八方講，今次大部份展品係華叔家人同校友借出，希望年輕一代了解華叔早期嘅求學生涯，亦表達教院對華叔嘅敬意。
展期至下月13日
另一份手稿係華叔撰寫嘅《屈原與漁父》劇本，有場景有聲音，仲有對白。兩份手稿睇落字字有力，噚日到場參觀嘅市民彭小姐大讚華叔字體端莊，仲帶幾分情感。做過葛師校友會觀塘學校代課老師嘅學生韓小姐記得，校內天台貼滿華叔文章，佢印象最深：「你睇完會發覺佢對教育好有熱誠。」
紀念展展期至2月13日，逢星期一至日朝早10點至下午5點（公眾假期除外），喺教院香港教育博物館公開展出。
mailto:[email protected]