大家仲記唔記得《宅男最後的120小時》，呢套短片出名，唔單止因為曾經大受歡迎，仲因為短片製作人林氏兄弟舊年揚威海外，獲邀去瑞士參加電影節，但係政府唔肯資助。立法會噚日討論創意產業發展，議員舊事重提，批評政府發展創意不力。
民主黨李永達話，過去有幾次本地創意人才喺國際比賽獲邀參賽，都因為冇錢到國外，喪失揚威海外機會，政府應該向呢班人才提供資助。
商務及經濟發展局局長劉吳惠蘭話，政府支持創意人才出外參賽，但係國際比賽數目太多，須制訂資助創意人才出外參賽嘅準則。八方勸劉太唔好做咁多無謂嘢，林氏兄弟當初求助無門，就係死喺資助機構嘅官僚制度手上，整一套標準出嚟都係盞搞。