內地傳咗好耐嘅房產稅終於出台，由重慶率先推行，投資情緒趨負面，內地股市顯著回落，帶動港股噚日下跌159點收市，報收23527。
現貨成交略為增加至812億元，但係仔細睇吓，會發現恒指成份股嘅成交量大幅縮減，沽盤集中喺H股，中資金融股嘅沽壓都唔細，反映沽售對象唔係全面性，近日偏強嘅傳統藍籌股走勢靠穩，大市仲未擺脫區域上落嘅格局，港股已經靠近支持位，整固吓又會炒番高。
恒生C輪26938：恒生銀行（011）噚日報收130.90元，跌1.8%。股價由去年11月初開展新一輪升浪，到家升勢冇變，俾啲耐性，今季有機上試140至145元，可以諗吓隻C輪26938。
隻輪現價14仙，2011年6月1日到期，行使價119.99元，溢價2.4%，引伸波幅30.4%，槓桿率9.4倍（有效6.3倍），正股升上145元，26938睇25.2仙，升幅有8成，正股跌穿126元就沽咗隻輪。
俊樺