恒生銀行（011）噚日舉行「恒生．珠三角環保大獎」頒獎禮，一開場，副董事長兼行政總裁梁高美懿（圖）就為自己銀行省吓招牌。梁太話，恒生喺提倡環保同減排方面，唔單止以身作則，仲推己及人，鼓勵喺香港同珠三角營運嘅廠商提升環保表現。
就以今次各個參賽環保項目嘅成效嚟睇，單計廢物，一共減少咗14萬公噸，相當於3700個維園嘅面積，至於水電亦都慳唔少。連主禮嘉賓之一嘅環境局局長邱騰華，都讚恒生對社會嘅「綠色」貢獻。
既然政府都畀個「讚」，咁員工又會唔會有分加呢？梁太就同華華講，公司一向論功行賞，佢透露整體加薪幅度一定高過舊年；之後，恒生發言人解畫，話平均加幅介乎1%至4%，不過唔係人人有份喎！