村代表選舉如火如荼，今年多咗好多新人落場，挑戰舊有原居民代表，特別係元朗、屯門，好多鄉事舊人隨時落馬。八方噚晚收到料，元朗新田鄉永平村原居民村代表選舉，角逐連任嘅新田鄉事委員會主席兼元朗區議會當然議員文富穩，爆冷以3票之差，輸畀一名報稱退休人士嘅「新人」文志生。
文富穩噚晚同八方講，佢之前一直都係自動當選，今次喺有對手之下落敗，好難估係乜原因，或者村民想見吓新臉孔都唔奇。文富穩呢鋪輸咗，佢新田鄉事委員會主席，同埋因鄉委會主席關係做到元朗區當然區議員，經此一役，兩個職位都會冇得做。佢係繼離島區議員黃福根之後，第二位因為選輸咗被叮走嘅區議員。