都話英足盃係爆冷嘅溫床！究竟邊幾隊前晚咁唔好彩喺第3圈出局？咪係東北3虎紐卡素、米杜士堡同埋新特蘭囉，其中紐記13年前喺史提芬納治手上死唔去，但今次冇咁好彩，喺少打一人下輸1:3，爆咗個5.1倍主W同埋50倍波膽出嚟。
作客不敵英乙「史提芬」
猶記得喺98年1月，當時由杜格利殊執教嘅紐記喺舒利亞、碧堤同羅拔李爾等帶領下，作客當時屬非聯賽球隊嘅史提芬納治，最終被逼和1:1（重賽紐記憑舒利亞梅開二度贏2:1）。今時今日，紐記雖則再唔係英超一線，但前晚個陣容，仲有高洛仙尼、路蘭、祖爾巴頓同阿倫史密夫，作客乙組仔史提芬納治，賽前外界都會諗點可能過唔到關呀？
但踢波嘅嘢，唔係球星多就一定贏。半場雙方踢成0:0，但到下半場開賽賽唔夠5分鐘，紐記就因米克威廉臣擺烏龍而落後，5分鐘後再俾保斯域克射入輸到0:2，之後喺71分鐘仲有迪奧迪領埋紅牌而10打11。完場前雖則由祖爾巴頓追番粒，但轉個頭又俾彼得維尼攻入而輸1:3完場。
賽後喺慶祝時俾自己球迷打咗拳嘅史提芬納治後衞拉亞特話：「我哋班球迷之前成日講喺13年前，差少少就贏紐記，估唔到今日終於變成事實。」至於紐記領隊柏度就話：「我哋被睇好可以出線，結果搞成咁，我對賽果同埋球隊嘅表現感到非常遺憾。」輸俾乙組仔唔止紐記一隊，英冠球隊米杜士堡，亦以1:2敗走喺英乙排尾6嘅伯頓。而連埋喺主場以1:2輸俾英甲球隊諾士郡嘅新特蘭，昔日嘅英超東北3虎全部喺第3圈好肉酸咁講拜拜。
西布朗黑池都下馬
呢日亦有另外兩支英超隊領嘢，分別係西布朗同黑池，其中西布朗以0:1敗走英冠雷丁後已連輸6場，睇怕領隊迪馬堤奧都嗰頭近；而黑池大變陣作客甲組隊修咸頓輸0:2後，餘下時間護級好過。
近3季英足盃第3圈出局嘅英超隊
球季：10/11＊
球隊：紐卡素、新特蘭、西布朗、黑池
球季：09/10
球隊：曼聯、韋斯咸、布力般流浪、侯城
球季：08/09
球隊：史篤城、曼城、保頓、韋根
註：不包括重賽
＊截至08/01（上周六賽事）