香港大學今年100歲生日，為咗慶祝成為真正「百年老店」，港大決定玩鋪勁，安排一連串活動直落2013，咁大件事，學校噚日特登搞咗個「百周年啟動禮」，請晒所有同港大有關嘅新知舊雨親朋好友，齊齊同港大賀壽。
海外校友專程返港
話晒成百年歷史，同港大有關嘅學生、教職員、校友、家人到街坊街里真係數都數唔完，結果噚日一共有超過4,000人齊集何鴻燊體育中心參與kickoff。唔少名人校友都出席，好似「寶哥哥」李國寶、馮國經咁，聽港大友人話，唔少舊校友今次專程飛機返香港見證呢次賀壽，話機票幾貴都值得。
叫得做kickoff真係冇吹水，成班嘉賓真係齊齊踢波為百周年慶典揭開序幕。之後就出現第一個高潮：2,000個學生、職員同校友大巡遊，出場嘅各個學院，工程學院就整番頂工程帽、牙醫學院就攞住吹氣牙咁，之後就講到13個Hall，U-hall帶隊係「U-Hall三寶」三嫂；成班宿舍生仲齊齊cheering，令在場嘅港大友同嘉賓即時諗起好多回憶。「金刀梁」梁智鴻同班教授就cheer埋一份，認真高興。
巡遊之中仲有港大嘅非本地生、圖書館、畢業生協會等等，大家都別出心思為學校賀壽，非洲生就打吓非洲鼓、太極高手李暉亦耍番幾手。
今周舉行對談系列
咁難得有成4,000港大友咁大場面，壓軸戲唔使講梗係拍照留念。大家齊齊企係運動場草地，攝影師都要爬上運動場看台頂先影得晒，話晒歷史時刻，大家都冇怨言好識做，跟足大會指示排好陣，又齊齊高叫口號，4,000人一齊嗌「HKU！一百！」夠晒大場面。
八方問過校長徐立之，佢話嚟玩足兩年，加上大學三改四，又要籌錢起百周年校舍，少啲精力都唔掂，不過100歲呢個大日子，點可以唔玩大啲。慶祝活動頭炮今個禮拜舉行，由前任校長王賡武主持對談系列，為港大百年歷史解碼，想知道港大創校史，真係唔可以錯過。
mailto:[email protected]