咁多名人校友賀壽，最矚目嘅應該係全家出動嘅前財爺梁錦松，佢同太太伏明霞帶埋三個仔女都有到場。巡遊嗰陣，兩個囝囝俾班叔叔伯伯遮住睇唔到，結果除咗「跳水皇后」媽咪出手之外，「金刀梁」梁智鴻亦幫手抱起抬高。阿松同八方講，港大係佢成長嘅地方，所以特登帶埋三個仔女去見證一下呢個歷史時刻。73年畢業嘅阿松，同屆仲有馬時亨同廖秀冬。佢話自己當年讀書好開心，不過學校就冇今日咁大，有咁多個宿舍。
金刀梁緬懷宿舍生活
講開住hall，金刀梁就同八方講，話自己係Uhall改裝之後嘅首批新生，住得宿舍就肯定會俾老鬼玩，不過佢話當年大家好斯文，冇話俾人happycorner，只係凌晨要走落去西環買糖水咁，所謂玩新生都只係加深感情啫。反而家好多學生都話冇宿舍住，佢覺得冇hall住簡直係令大學生活唔完整，八方就希望身為校董會主席可以有啲牙力，叫政府起多啲位畀本地學生。