一眾有iPhone嘅車主，除依賴GoogleMap做導航，最多攞嚟打吓機就算。查實智能手機N咁多個Apps，用得唔好嘥，今日介紹嘅小工具，夠實用又具娛樂性，等你喺2011年可以揸住iPhone、路路暢通！
記者：徐影龍
攝影：周旭文
Model：LaYing、Halie@GMEModels
《香港交通快拍》趨吉避凶
揸咗豐田bB幾年嘅老編，聽到話做Apps特輯，話一定要講呢個《香港交通快拍》。事關入面嘅「交通新聞」功能，將港九新界突發交通事故，以超快速度Update，佢就試過幾次屯門、觀塘大塞車，靠佢知道前面發生乜嘢事，雖然都係塞一輪，但遇着大鑊嘢，可盤算一下改道而行，慳番唔少寃枉時間，雖未至於「趨吉」，但絕可「避凶」，1.99美金算物有所值。
呢個Apps最強地方係「交通快拍」，駁住運輸署路面監察鏡頭，各大區道路情況即㩒即知，出發前望一望，又係SaveTime好幫手。最可惜呢個功能幾日前突然失靈，俾網民鬧到七彩，官方話已解決相關問題，心急嘅話大可Download用住先，等更新版出爐。
免費小工具
老竇嗰代教落「唔怕貴、最怕免費」，今時今日周街試用版同FreeWare，呢句嘢已不合時宜，以下呢堆Apps全部FreeofCharge，好玩實用兼而有之，請慢慢享用！
實耗油量《VehiCal》
記錄你車程同耗油等資訊，每次入完油習慣性咁輸入番油費及路程等資料，作一個耗油分析，仲可加入超過20部車嘅紀錄，有錢富二代或有車隊嘅公司尤其啱用。Apps預設單位係加侖及英里，應先到Setting度改番港人用開嘅公升及公里。
安全提醒《instanttraffic》
標示出港九新界各個沙龍位分佈，每當臨近「靚仔位」會有響聲提示你安全車速。當然，呢個Apps只係提醒一啲無心之失嘅車主，你慣咗長期超速揸快車，抵抄牌啦！
乜車都識Call《iCallCar》
一個Apps包含紅綠的士、貨Van等Call車公司電話，連拖車服務都有40間俾你揀，唔怕緊急時手忙腳亂，可算車主必備Apps之一。
泊車入油唔使搵《關理車事》
揸車到陌生地方，第一最怕搵停車場，第二就係油缸燈「見紅」。呢個Apps除咗有齊大小CarPark位置同收費外，仲有就近油站分佈，全部可連上GoogleMap搵最佳行車路線，幾偏僻都唔使驚。
消閒女
介紹完實用Apps，輪到最令人神魂顛倒嘅遊戲類。男人最愛嘅賽車Apps有唔少，但好玩又免費嘅唔算多，以下兩個都值得一試。
頭搖尾擺甩住玩
《DriftMania》
iPad專用Game，全3D實時運算，賽道同戰車均做得好仔細，玩法更係非常刺激嘅飄移入彎，扭吓擰吓玩到頭都側埋。Lite版提供兩架戰車，其中一款仲扮晒寶馬M3，換晒碳纖及拉花，相當抵死。
仿車震打破悶局《saicmotor》
輸入一男一女相片，然後推斷出愛情結晶BB樣貌，玩法唔算創新，但抵死在過場動畫有男女「車震」剪影，仲要你猛Chok部iPhone先出結果，一男一女坐喺車內無話題，呢個Apps就係你救星。
