香港資源（2882）主席黃英豪，本身是律師，幾年間做了3次白武士，現時更落手落腳主理金至尊，被冠名為「新金王」。
「叫新金王誇張得滯喇，仲有好多嘢要學，我實際係一個新丁。」但「學師仔」亦交到貨，兩年內將瀕臨死亡的品牌起死回生，金價又從他09年入主金至尊時的每盎斯680美元，升至逾1400美元，煉金術，講運氣，更講頭腦。
「白武士有個歷史，WhiteKnight英雄救美嘛，但實際唔係咁浪漫o架，自己對M&A（合併收購）好有興趣，但需要有個機會先可以做……」金至尊一役並非黃英豪的處男作，他說，與拍檔尹應能做過好多投資，包括海域化工（即現時的香港資源），只不過以前不出面，今次則做大股東。
投標金至尊 抱平常心
「金融風暴嗰陣，律師行業淡靜啲，一環扣一環嘛……08年9月風雨飄搖時，我哋加班喺10、11月去落標，出標嗰陣，200間retailshops喺內地，啲貨散落喺唔同嘅地方，做盡職審查好艱難，重組亦唔容易，當時拍檔劉旺枝（即集團執行董事）話，就算唔得就當上咗堂MBA，當時抱住平常心，平就買，對手係幾家內地上市公司。」
「有危就有機」，這句話雖然老掉牙，但千真萬確，最後他以資產淨值的52折，買了金至尊的存貨兼接手整個零售網絡。
雖然救美過程不浪漫，但黃英豪卻得到很多「麪包」，根據香港資源公佈的2010年第4季銷售表現，金至尊總銷售額5.37億元，增長29%，在剛過去的聖誕假期，特許經營銷售的銷售額升94%，自營銷售點的銷售額亦升34%，集團稱，對農曆新年的首季度表現感到樂觀，「金係一個套戥、投資工具，我睇1400至1800蚊美金（每盎斯）之間，1400至1600蚊美金係正常，金嘅牛市仲未結束！」黃英豪如此補充。
做品牌 要與名人掛鈎
運氣已有，亦努力邊學邊做，但「轉數快」更不可缺──「做品牌一定要同名人、明星掛鈎，要有個dream喺度，好似卡地亞個紅色盒咁，仲要beautifulpeople。」所以繼續找陳慧琳做代言人，又贊助電影《葉問》，前一陣子，還贊助韓國女子組合WonderGirls。
據他透露，最新的搞作是在劉德華和鞏俐的新片《我知女人心》有植入式廣告。「內地籃球受歡迎過足球，所以我做咗個選擇，同籃球多啲掛鈎（贊助球賽），牌子先有認受性，再加名人去推，係事半功倍。」再次證明，要成功，有運，更一定要有腦。
記者：何凱兒
