「無綫廚神」李錦聯上星期四喺歌手女友邵敏婷（Rachel）尖沙嘴家中，因為感情問題發生爭執，事後警方以傷人罪拘捕二人，Rachel仲另涉高空擲物罪名。事件發生後，Rachel被發現喺facebook狂鬧李錦聯又老又cheap，而李錦聯就宣佈同女友掟煲，半年情玩完。點知佢哋分手唔夠3日，噚日竟然玩復合，真係唔到你唔服！
女友外賣咖喱箍煲
噚日又有報道話李錦聯自爆另結新歡，但馮仁昭打電話同佢求證，佢話根本冇咁講過：「冇！邊有咁嘅事！」有讀者話佢以前對女友都係粗粗魯魯，李錦聯大呼寃枉話：「梗係唔會啦，絕對冇咁嘅事，反而我同邵敏婷已經修好咗！」
李錦聯同Rachel噚晚仲一齊出席觀塘一個晚宴，問Rachel點番男友，李錦聯代答話：「大家對對方仲有感覺同好感。今次令我哋互相了解同感情更跨進一步。」李錦聯澄清女友係44歲而唔係54歲，又大爆女友打動佢嘅主要原因：「噚日佢買阿龍咖喱擺喺門口引我，我覺得佢好有誠意。」
自爆昨晚一齊過夜
問Rachel喺facebook鬧李錦聯嘅事，佢話：「半講笑半嬲啦！」李錦聯之後大讚Rachel：「佢係我心入面永遠最愛嘅女人。」可惜Rachel唔多受落咁話：「我唔係好欣賞佢呢句說話！」搞到李錦聯好尷尬咁死撐：「佢係含蓄啲嘅！」
李錦聯又話天寒地凍，噚晚又冇地方去，所以都會一齊過夜。馮仁昭叫佢哋影相，李錦聯就問使唔使錫啖，跟住就咀埋Rachel度，好似做大龍鳳咁，但Rachel好唔願意咁款，仲眼泛淚光㖭！
