數香港經典電視廣告，滙豐銀行出品一定佔咗幾個席位，唔少香港人到今日仍然記得「我唔係想食你煮嘅麪呀，我係想見多你幾面咋！」呢句冧爆台詞。八方最近見過滙豐香港區個人理財業務市場主管黃淑儀（Audrey），佢同八方講，話新一輯電視廣告已經拍好，今晚就會出街，希望新廣告可以一樣令市民受落。
搭3.5米高玻璃平台
廣告嘅主題係延伸自平面廣告，講滙豐服務點樣一日千里咁發展，為咗表達銀行同香港一齊成長，廣告就度出一個新玩法：鏡頭一直由下至上拍攝，用仰視鏡頭表達「植根」香港。聽Audrey講，今次係本港第一次用呢種仰視拍攝手法拍廣告，要特登搭個3.5米高嘅玻璃平台，後期製作仲要搵西班牙電腦特技公司塑造過去同未來香港嘅場景，大陣仗幾乎媲美拍戲，計落肯定使唔少錢。
創新之餘，廣告都冇忘記大家嘅集體回憶，加入咗幾個經典場面，好似媽姐（順德女傭）打開發光紅簿仔、漁翁撒網咁，都係滙豐之前拍過嘅經典場面，同觀眾一齊重溫。