國美電器（493）贊助嘅「國美盃賽馬日」噚日圓滿結束，華華聽講，佢哋今年請咗供應商老總嚟，齊齊坐靚靚包廂，欣賞呢種具資本主義特色嘅活動。聽講平日經常被壓價嘅老總噚日應該好開心咁離開馬場。點解？皆因噚日即場提供嘅國美盃貼士，全部中晒！
華華收到風，噚日由馬會派出、專門服侍國美包廂嘅馬評家，第8場國美盃開賽前貼咗4隻馬畀國美高層同埋供應商老總參考，分別係「奇異福星」、「大智慧」、「飛闖」同「旅英駿駒」。華華睇過，啲馬賠率都OK好分，平均有6至7倍，但勢估唔到嘅係，4隻都中晒！
大家無睇錯，係4隻馬都中晒，皆因「飛闖」同「旅英駿駒」跑咗雙冠軍！連雙冠軍都貼中，華華都好想知個馬評家係邊個，可惜國美中人好口密。
下年國美盃，若果仲係呢個馬評家負責畀貼士，相信啲老總會爭住嚟香港。
mailto:[email protected]