（續上周）……仍然是那個十算的東京。
他們都喜歡去泰國做「年年驗身」，貪它不太貴就可以好豪華，由頭「照」到腳之餘還可以當酒店住當spa嘆，完事之後退一步出曼谷又海闊天空了，簡直完美假期，不想被人知的「初老者」完全有個買食瞓的短線自由行作保護色。
計我話呢，想知自己身體機能有無退化之嘛，去東京一樣得！
理論是：去一個令你relax的城市你又怎知自己狀態有幾好？
梗係去一個吓吓「掹到衡」的地方才試得出自己的極限吧！
所以想知自己身子有幾好，一定要揀東京啦，如果真有這麼一個榜：「地球上令人放假辛苦過返工的城市」，佢夠膽認第二，請問仲有邊個夠膽認第一？
唔想拎
他們都說年紀大了，消費力便強，計法大概是人越老便賺越多錢，便買得起越貴的東西。
其實只對一半。
年輕時貪多，因為易厭，所以要轉款轉得密，一萬幾千Yen的東西一買買30件50件。到了成熟點，才會追求量少的好嘢，只買三件五件但都是十幾萬甚至幾十萬Yen的高級品……但為甚麼有這種「升呢」的微妙變化，我雖然也是過來人，也說不出是為了甚麼？如果一定要解釋，原因會不會是──因為不再年輕力壯，體力不再賤賣，所以「唔想拎」呢？
是是是！近年真的是有很多東西都只不過是因為唔想拎而唔買，尤其是在下午4點前遇到而只是50/50麻麻哋鍾意的東西，因為明知如果一時心軟婦人之仁把它買下，便等於要拎住它一整天，那麼莫講話係一對boot，一件羽絨褸要抬足wholeday都會變得好煩好重的，所以如果那間店不肯送貨，而那件衫我又不是鍾意到黐線，而我遇上它的時間是下午茶前，那麼，sorry，你便唔好彩了，我便會想盡各種理由游說自己唔好買你，只為了唔想拎。
比如Number（N）ine，設計師宮下貴裕復出後的個人系列Soloist，推出前我都是滿心期待的，見到實物後，你猜我想出了一個怎樣的理由說服自己一件都不幫襯？
我覺得N（N）的衣服最有趣的地方是他「撓搞」得來「華麗」，但近年宮下全盤反璞歸真，將「華麗」全面革除，試問只剩「撓搞」仲有乜好着？
對，咁都畀我諗到，我真係好唔想拎！
（事實上，近年懶到另一set給自己的規矩是，如果又是「買又得唔買又得」的東西，那麼就必須等在同一間shop有多於一樣嘢想買才去碌卡，否則得一件貨又去排一輪隊，太煩！）
讓咪錶跳
我有位至親，每次和他出外旅行，一跳上部的士，他便進入極度緊張的備戰狀態，全程心緒不寧看着司機有沒有行錯路，兜路或者專登揀條塞車的路線來呃多些車錢。
我當然知道在一些的士車資驚人的城市例如東京倫敦，這樣兜一兜塞一塞後果可大可小，也明白自己付了幾多機票酒店費用來換取那幾日的「落地時間」是多麼的寶貴，要是浪費在可以避免的塞車上是多麼的「唔抵」，更明白「至親」的焦躁心情純粹出於愛錫我們心切……換了是我，後生五年的話，我對着那個言語不通的日本司機，分分鐘「唧」得大聲過佢！
然而，今天，在這冬日東京的黃昏五點幾六點，天已全黑，我已逛了整整五小時全個新宿拎住六袋都幾重吓嘅shoppingbag對手都痠痠地之際，忽然上到一架暖氣開放嘅的士返澀谷，而車程本來的15分鐘卻因為小小塞車要變成30分鐘，sorry，這對我來說真是喜訊不是噩耗，因為噚晚瞓咁少「恰」15分鐘點夠？小睡30分鐘對一個shopper嚟講啱啱好最補身！
所以阿「至親」，不要再咒罵司機了，讓咪錶跳，讓我睡吧，我不青春了！
義氣Miffy
今次去東京驗出另一種身體機能的退化──腸胃。
本來真是日日食完六餐晚上回酒店前還是忍不住殺去便利店搬一堆三文治飯團便當零食回去的，因為明知自己人在東京會長出神秘的第七個胃，明明這分鐘痛苦狂嗌「好飽呀！好飽呀！」不夠兩小時後冲完凉睇一陣電視便又開雪櫃摷嘢食……
今勻推動力更大，只因撞正Lawson歲末的推廣活動，幫襯指定食物便有印花，儲夠20個便送我心愛的限量版Miffy咖啡杯，但那些有印花的食物全部極膩極飽肚，例如：豬扒治三枚，草莓忌廉蛋糕二枚，朱古力瑞士卷二枚，忌廉泡芙一枚……
我只得五日四夜時間晚晚食完正餐回去再狂隊也只能隊到28枚印花，已經嘔咁滯，所以真的不好意思，今次真的不夠義氣，只能換到一隻畀自己，換唔到畀你啦，但我真係盡咗力啦，我已經肥咗三磅啦，唔好怪我啦，容祖兒！
Textby黃偉文
mailto:[email protected]
微博 http://t.sina.com.cn/wymanwong
本欄逢星期日刊出
