人總係犯賤，天熱時好想冬天快啲來臨；到天氣非常寒冷，着衫着到成隻糉時，就好想去泰國過暖笠笠的冬天，不單止有水上活動和bikini女郎，還有又辣又好味的泰國美食。
記者、攝影：蕭漢祥
一雙一對OnTheBeach
泰國的沽島的確是一個孤島，位處泰國和柬埔寨國境之間，四面環海。有咩好做？估都估到第一大當然係水上活動啦，在SonevaKiriResort內，玩水上活動有多種方法，第一是部份房間有自己的沙灘，夠晒私隱！不過小記愛熱鬧，選擇駕駛每間房都有提供的高球車，去resort的公眾沙灘，跟bikini女郎暢泳……當然，跟bikini女郎係相隔幾廿米距離嗰隻，因為去得呢個resort，一般都係一雙一對情侶或夫婦，大家唔使旨意喺度識女仔。除咗沙灘，出海活動如浮潛、潛水、滑浪風帆乜都有得玩。
小記於resort的五天內，幾乎每日中午之前，都見到一對來自英國的情侶，在沙灘一直hea到傍晚，閒談間知道他們今次旅程目標就係要嘆世界，每日淨係游水曬太陽飲飲食食係咁多。就連午餐同晚餐統統都可在沙灘旁的餐廳包辦，泰式美食好似冬蔭功pizza，雖則不夠冬蔭功湯辣，但味道非常特別；到晚間還有BBQ自助餐，可惜當晚遇着大雨，未能享用這個大自然feel的美食。
浮潛：私人團（兩人）$4,103、公開團每位$1,077
（包救生衣、潛水鏡、蛙鞋、生果飲品）
潛水：單次潛水$1,026位
跟Benz大廚學泰菜
有人喜歡日日在沙灘游水曬太陽，但查實曬兩日咩都夠，仲有甚麼可以做，不如上吓非一般的烹飪班！參加前須事先向你villa的管家Mr或MrsFriday安排行程，安排你到集團於resort外的Benz餐廳，呢度同那個汽車品牌無關，店名全因大廚就叫做Benz。Benz師傅會帶你到resort東面，約15分鐘車程的AoSalat小漁村，先跟佢學揀海鮮，話晒泰國菜不少都用上魚蝦蟹，亦可順便遊覽這個美麗小島。
買完海鮮，返回Benz餐廳，學煮泰國菜。課程有深有淺，當然小記呢類十指不沾陽春水的人，就要學啲簡單而賣相呃到吓人的菜式，呢日Benz師傅就教泰式沙津、咖喱雞同冬蔭功。一切清洗配料的工作唔使你做，住客只要站在枱前，記住Benz師傅教授混合配料的份量和次序，一步一步就學識。由於Benz師傅煮得太熟練關係，佢落配料落得好快，大家一分神就會睇唔切。
Benz師傅烹飪教室
費用：每位$641（最多4位）
一人一籠太霹靂
唔想自己煮，可以去島上瀑布美景前，來個野外午餐。講到好似好簡單，但其實旅程都幾wild，要夠腳骨力走過森林，涉過石澗，每格梯級有成呎高，上落都有啲辛苦。經過約10分鐘路程到達KlongYaiki瀑布，當日仲有一戶人家在BBQ中，小朋友在水池暢泳，只見Tamsin好醒目地早已着上泳衣，一到就脫去外衣跳進水裏，另一位行家二話不說，走到瀑布頂一躍而下，好激！
無膽兼無泳褲的我，惟有乖乖坐在瀑布前，邊影相邊嘆一人一籠的「太霹靂」（ThaiPicnic），籠內有泰式豬肉、泰式沙律、辣蝦、雞肉、米紙卷等共11道菜式。此外，好多旅客也愛在島上「自駕遊」，駕駛的是單車和電單車，且全程有Friday陪伴左右，唔使驚在沽島迷路。
遊歷沽島之旅（包野外午餐）
費用：私人團每位$974/公開團每位$307
宮殿船浪漫一粒鐘
沽島周邊無大型島嶼，東面又要成30公里先見到柬埔寨邊境，西面出海更加一望無際，最啱就係出海睇日落。Resort除了有多艘豪華快艇接載住客，還有一艘宮殿式的小船，正是用來出海睇日落。傍晚五點上船，個多小時船程中，可邊欣賞日落，邊嘆香檳小食。由台灣來度假的吳先生講：「與女朋友在船上欣賞日落夠晒浪漫，即使只短短個多小時，都好enjoy!」的確，這次旅程是小記的旅遊生涯之中，最嘆最relax同最似度假的一次。
海上日落之旅
費用：每位$128（包小食及香檳）
SonevaKiribySixSenses
房價：每晚約$15,317起
網址： http://www.sixsenses.com/Soneva-Kiri
LoversonKohKood
溫馨提示：喜歡睇星星的朋友，沽島呢度有個觀星台，電子天文望遠鏡、電腦星圖及專人教你觀星，必定勁過你屋企嗰支。
TravelMemo
持特區護照或BNO免簽證。泰國領事館：25216481
國泰航空香港曼谷來回機票$2,180起。查詢： http://www.cathaypacific.com
1港元約兌3.9泰銖（文中價錢已折算港元）
220V，兩扁腳插座
泰國
沽島
下周多雲，22-31℃
