二三線磚頭股隻隻一支箭，搞同類股，世紀城市（355）好抵炒。上年尾到家陣短短7、8個交易日，包括莊士國際（367）、資本策略（497），以至世城系內百利保（617），隻隻一支箭咁升，世城一路打橫行，已經有Point炒大落後。又世城連埋上年尾供股攤薄效應反映，最新NAV每股1.75元，現價0.60元折讓都高達65.7%，單係資產重秤前折讓已好吸引。
再講，隨住世城旗下百利保「南灣」項目入賬反映（百利保應佔銷售額，超過40億銀），連埋另一家富豪酒店（078）旗下嘅富豪海灣重秤，世城NAV折讓隨時上70%過外，直情流口水。呢轉係咁易博世城翻半番到0.90元，連重秤效應反映，世城目標價嘅實際NAV折讓，分分鐘仲喺50%水位，實情仲有大把向上收窄空間。
短炒漢傳媒博升23%
漢傳媒（491）公佈以2.4億銀投資老撾再生能源項目，項目之一，包括桉樹人工林項目。而呢期所見，木業股好似中國木業（269）及永保林業（723），全部有鑊氣，漢傳媒有Point炒同類概念。又漢傳媒連埋上個月配股攤薄效應計，每股NAV0.27元，現價0.22元仲有折讓。呢轉趁有消息，博漢傳媒上望每股NAV，現價潛在回報率近23%，短打有魚有肉。
錢雋