支聯會每年喺維園年宵擺檔，主席華叔年年坐鎮，幫市民寫揮春籌款。華叔喺回憶錄《大江東去》憶述，抱病之前每年喺年宵寫揮春嘅時間超過100個鐘。對於市民想喺揮春上寫乜嘢恭賀說話，華叔自言初初自己非常保守，譬如市民要求佢寫「橫財就手」，佢一定耍手擰頭，但後來覺得都冇乜所謂，但求大家開心。
不過開心還開心，有陣時華叔都好幽默，有市民某次要求過佢寫一張「財色兼收」嘅揮春，華叔當時就開咗一個玩笑，將四個字寫成「才識兼修」，祝願呢位市民才學同知識都有修成。唔講唔知，原來身為主席嘅華叔，自從可以領取生果金後，每個月都將生果金自動轉賬去支聯會賬戶，真係有心。