考評局年年都俾考生鬧爆，形象唔多好。為咗令考生多啲了解佢哋，該局噚日起一連三日舉行資訊日，介紹佢哋嘅工作，同埋講解明年開始嘅新中學文憑試，等考生知多啲。
呢個資訊日唔止齋講，仲展出收集返嚟嘅香港公開考試文物，多數仲係首次公開展示，好似1936年嘅中學畢業會考證書、歷年舊試題、考評局接手公開試後於78年發出嘅首張會考證書，仲有片段介紹佢哋每年點秘密電腦改卷。考評局主席吳克儉親自同參觀嘅學生講解，算係有誠意。
資訊日喺銅鑼灣中央圖書館舉行，今日只接待高中生同教育工作者，聽日就開放畀公眾入去睇，朝10晚5開放。