現年51歲的「無綫廚神」李錦聯前日疑因感情問題，涉打54歲酒廊歌手女友邵敏婷（Rachel），事後警方以傷人罪拘捕兩人，但同獲准保釋候查。據悉，二人在出事前六小時，Rachel曾於facebook留言喪鬧李錦聯又老又cheap，還直認已另結新歡。李錦聯昨日則指女友是大醋埕，脾氣「好差、好差、好差、好差」，更宣佈半年情正式玩完。
在無綫節目《都市閒情》中教煮餸的飲食主持李錦聯，去年撻着比他年長3歲的性感酒廊歌手邵敏婷。有指Rachel身邊男伴不絕，但李錦聯對她死心塌地，甘願為她大灑金錢兼24小時oncall，結果Rachel成功被媾掂。想不到甜蜜六個月後，前日早上約8時，李錦聯在女友的尖沙嘴家中，二人因感情問題發生爭執，李涉打女友，事後兩人均被捕。
女友fb留言辱罵
據悉李錦聯發生涉打女友前約六小時，Rachel在凌晨1時30分在facebook留言喪鬧李錦聯：「IneedtosayGoodbyetothisdirtycheappooroldman.（我要向這個污穢、低莊的可憐老男人說再見。）」她自爆另結新歡，李已不是她的杯中茶。昨日記者致電Rachel，但她沒有接聽。
李錦聯昨日於電話中表示與Rachel拍拖半年，彼此均有對方家門匙。提到前日兩人疑有打鬥，李錦聯說：「我點會打鬥？冇可能。有時啲女士㷫起上嚟話乜……其實驗傷係乜事都冇。」他稱與女友出現瑣碎感情問題，前日早上到女友家執拾物件，至於是否有人提出分手？他說：「我嘅選擇係冷靜一陣，其實冇乜大問題，我覺得正常社交活動有其他人一齊，大家都要有個空間，但佢係一個緊張啲嘅人。」即指女友呷醋？「可以咁講。」李錦聯自稱多女性朋友但不花弗，反指女友都多男性朋友。
「上周反轉電視機」
據稱事發時Rachel怒極失控，曾拿起手提電腦掟向李，李及時避開，電腦卻穿過玻璃窗由7樓直墮地下，問李錦聯誰先動手？他只說：「當時混亂，我唔係太清楚，最後發現有呢樣嘢（電腦）跌落街，呢個係極度危險嘅行為，係我報警嘅。」而他也受輕傷，頸部被刮傷，他強調：「我只係捉住佢隻手，打親交一定係男方唔抵，所以我係制止唔畀打交……因為我要攞番嚟做嘢，我仲有好多私人物件喺佢度。」
李錦聯會否擔心涉打女友影響形象？他說：「呢啲事每日都有好多人發生，今次係因為個電腦跌落街先會曝光。其實我先前已經報過一次警。上個月28號（上周二），佢喺屋企等我，但等唔到，佢將我屋企個電視機倒轉晒。」就因Rachel反轉電視機故他報警求助？他說：「佢唔畀我攞番啲嘢，我哋做生意嘅要用資料簿，卡呀、身份證呀，喺晒佢度，佢唔畀我一定要報警開門攞番，嗰次我並冇追究刑事毀壞。」
該次Rachel等李錦聯回家，是懷疑他媾女？他否認：「唔係，佢比較任性，但心地好好，唯一係脾氣好差、好差、好差、好差，同佢講過好多次話我接受唔到，希望大家有個冷靜期。」有否復合可能？他說：「我諗機會低啦，我係鍾意佢，無奈佢性格比較剛烈，接受其他異性朋友嘅指數，包括我自己都係──低嘅。」
昨展示頸後抓痕
李錦聯揚言曾考慮與Rachel結婚，他說：「我想搵個好好嘅伴侶，似乎佢唔係囉。」二人打得火熱時，曾透過facebook各自上載攬攬錫錫照，Rachel更與杜德偉、張立基及不同男伴合照，相信其社交相當活躍。
昨晚李錦聯在旺角一間酒樓表演，向在場近百師奶粉絲高唱《舊歡如夢》，有女粉絲衝上台伴舞，李直言此曲是送給他以前的女朋友聽，現場他演出風騷，又向記者展示頸後幾道抓痕，他說：「其實我仲好鍾意佢（Rachel），好就佢好錫佢，但性格唔啱。」是否已算分手？他答：「係。」他稱今次是小爭執會很快銷案，而他暫沒收過無綫要求休假的通知。
無綫外事部副總監曾醒明昨日對李錦聯涉打女友事件說：「因為事件調查中，TVB不作回應。」
採訪：夏琴、王崇穎
攝影：陳俊強
