拜讀過漫畫《男兒當入樽》的熱血漢子，心中總有一團燃燒的火燄，余文樂和周柏豪也不例外。兩人去年加盟橫洲工業籃球隊，透過fb、微博成功結集一班忠實fans。不過兩人樂不在此，反而是享受與兄弟們打波盡興的時光，為共同理想邁進，延續他們一直追求的籃球夢。 撰文：馮國康
還以為是NBA球星訪港。早前政府舉辦一年一度的康文盃籃球決賽，全體育館塞滿觀眾，就連甲一賽事都未試過如此墟冚。觀眾焦點只放在兩人身上，就是香港籃球青年軍前成員余文樂和周柏豪。
常說藝人愛虛報身高，面前的樂仔無加鞋墊、襪墊，依然有178cm，剛開完會便氣喘喘的趕來練波。柏豪亦堅有六呎，紮實身軀怎看也不排骨，25歲仔屬血氣方剛型，有用不完的精力，他也是最早到場的一個。兩人同是典型80後屋邨仔，係睇《男兒當入樽》、聽徐嘉樂講NBA長大的一群，愛籃球並非因為容易識女仔，樂仔說：「細個班朋友鍾意打籃球，咪一齊打囉，冇諗過其他嘢。」柏豪則比較特別：「踢足球班朋友成日吐口水，感覺唔係咁好。同埋我鍾意籃球嗰種速度感同刺激感。」
周柏豪自認囂張
樂仔素有「元朗小霸王」之稱，想必是在街場蝦蝦霸霸而被冠之，問他可有試過在球場生事？樂仔說：「冇喎，我哋以前唔打街場，多數喺學校打，後來就去室內場打。」反觀柏豪則是性格球員：「我讀中學時好囂張o架！譬如過晒人之後，會一嘢拍落塊籃板度，所以身邊嘅人都唔係咁鍾意我。大個咗先發現原來打波唔係一人showoff，而係享受團隊精神嘅樂趣。」他鍾情《男兒當入樽》的仙道，正是因為他「打波勁得嚟唔囂張」，甚有「大將之風」。
曾是港青成員的樂仔和柏豪，入行後接觸籃球機會銳減，但熱誠從未減退，去年兩人便聯同一班港青兄弟組隊打波，重拾當年籃球夢。柏豪說：「我話不如組隊波打晒全香港所有嘅比賽，睇吓自己可以打到幾多場，去到邊個階段。」由甲一、甲二、前港隊成員組成的橫洲工業（名字取自元朗橫洲工業區）由此誕生，並於去年奪元朗盃冠軍，早前提及的康文盃則奪亞軍。
「康文盃總決賽輸咗，但嗰場比賽好多人支持我哋，嗰種感覺係就算贏咗波都買唔到。」沒錯，當日比賽橫洲工業的fans氣勢一面倒，連郭富城、沈嘉偉夫婦都是座上客，的確有漫畫中山王工業的王者霸氣。但說到底，全因樂仔和柏豪的明星效應。
可是一山不能藏二虎，樂仔、柏豪同場會否爭風呷醋博表現？樂仔斬釘截鐵說：「唔會，當然唔會。其實大家唔知會唔會誤會咗我哋組隊嘅用意，唔係為咗贏輸，而係第一，做自己鍾意做嘅嘢，第二，希望推廣運動，同埋又可以做善事，所以我哋唔會存在任何自私嘅嘢。」
樂仔擅射三分波
至於誰人較強？無論打波、抑或出道年資都較深的樂仔認真客氣：「都唔同位置，睇狀態啦。」柏豪卻甘拜下風：「佢好啲，佢一球入就攞三分，我一球入係攞兩分。」有說樂仔體能差，經常在比賽中段「莫氣」，柏豪為好友撐到底：「咁佢咁忙，正常吖，同埋一個三分射手，體能唔一定要超弗。」
柏豪說得沒錯，樂仔是典型射手，有機會便毫不猶豫投射三分球，且命中率驚人，亦因而成為對手的重點防守目標，每次總弄致傷狠纍纍，難道明星會被人針對？樂仔道：「未必，大家都係打波，我唔相信會特意睇住我哋嚟特別侵犯。」
慈善賽門票售罄
此外，樂仔和柏豪所屬的橫洲工業將於下周四（13日）晚上八時在灣仔修頓室內場舉行一場慈善友誼賽，屆時將迎戰由台灣明星黑人陳建州率領的LoveLife代表隊，門票早已被搶購一空，據知在網上更出現黃牛票，可見反應非常熱烈。
攝影：陳順禎
後記：明星好打得
未做訪問心中已充滿疑問，明星打波真係得？當日一見，疑團終於解開。先評樂仔，身形高但偏瘦，18呎外投奇準，球風屬瀟灑型，亦非傳聞中唔夠氣，但愛玩弄對手。柏豪，速度高、彈跳力強、爆炸力驚人，善快攻及衝搶籃板球，屬鬥志拼搏型，但較個人主義。兩人實力絕對可以肯定。
再評橫洲工業，全隊無論技術、紀律、士氣都遠超於業餘級數，但令小記既羨且妒的，卻是他們建立的深厚友誼，以及享受為共同目標而艱苦訓練的過程，而非結果。
