旗下有板前、板長等食肆嘅和之味集團老闆鄭威濤（Ricky），日前不理民間反對，用天價308萬港元投得野生藍鰭吞拿魚「日本一」，有網民前日喺網上討論區話板長員工本來1月7號出嘅糧，家最快要11號先出，質疑有錢投貴魚冇錢準時出糧。
高登討論區前日有自稱板長員工留言，話公司因為銀行自動轉賬出問題，今個月要11號或12號先有糧出，但係同集團嘅板前就準時出糧，質疑有人買魚使大咗，一時周轉不靈，「家只係夠出一邊糧」。
集團發言人麥健成答得離奇，竟然話唔清楚事件，叫員工有問題可以搵勞工處。勞工處暫未收到板長員工投訴。