"出番「生猛」捧阿奴大捷"
英足盃做今周主角，好唔好賭，我認為視乎你對英國4級聯賽嘅熟悉程度，配合值博率出擊；正牌莊家驚死，30幾場英足盃只係開「雙紅會」一個讓球盤，亦證明佢哋驚波友早着軍情先機或者鬥快知道英超隊會唔會出弱陣，唔想承受受注賭上定下讓球盤嘅更大風險。今天早場，預咗阿仙奴大變陣，但係換晒11人對住列斯聯都夠殺啦；乜盃都恨，唔會為下周中留力踢英聯盃4強留手，必想將畀曼城死守成功嘅怨氣盡洩。對手上季靠「射球機器」碧福特喺第3圈淘汰曼聯，碧福特都去咗愛華頓，呢場波冇得打。另外，尹佩斯擔正，阿奴班波嫌太高章；今場對英冠隊，出賓仔同好有效率嘅「生猛」查馬克兩位中鋒擔正，放心捧。
"冷殺手黑池臨修頓"
嫌阿仙奴[-1]冇肉食，同晚射多個愛隊黑池單W。個陣點換，都冇理由作客低兩級嘅修頓都成冷門。呢圈贏波有成80萬港元獎金，下圈贏即過百萬，細球會冇理由同錢作對。修頓嘅聖瑪莉球場我一丁友7、8年前去過朝聖，過得寧靜愉快；場靚利強隊發揮，慣被睇低嘅黑池今季長捧有數圍，跟輸一兩次唔會動搖我！
"艾歷臣重遇文仙尼有和氣"
要吼次級隊，當然要冷，本輪我最睇好李斯特城迎曼城保不敗兼博和局。李城領隊艾歷臣，遇上當年去英倫投靠佢學藝、現今貴為曼城領隊嘅文仙尼。曼城班大牌波遇強必強，但遇弱旅卻偶有失準。李城由艾歷臣執教後，漸上軌道，主場特勁，兩「師徒」聽日和和氣氣，重賽打多場收多場直播都幾融o架！
"熱刺同賠率抵博過車仔"
今季英超全線亂局，賭熱門真係輸死到天光，車仔近期屬箇中表表者；周日雖然只係迎戰英冠葉士域治，但賭波有時都係同日同時比較賠率同值博率去取捨嘅遊戲；佢哋嘅鄰會熱刺同日迎戰低兩級英甲嘅查爾頓，單W、[-1]賠率相若，點都捧後備兵強好多嘅熱刺大炒安心啲。哈利列納近年回起嘅威望，就係靠助老樸捧足總盃建立，再遇「舊愛」，自會命戰將盡數重拾往昔歡愉！
"利記對家旺 今次到曼聯"
有雜誌替對家本雜誌翻舊賬，指出上年初股神股后推介嘅股市預測同股票，年結計唔準繩；其實喺現今資訊爆炸年代，貼波貼馬貼乜都好，讀友好多都唔係淨buy貼士，係buy你寫得好唔好，分析有冇見地。（當然我長期買開嗰本財經雜誌，上幾期就係見到嗰位阿姐做封面，即刻冇興趣放低廿蚊，因為封號太響、水準卻長期不濟，這個同感，相信唔止我一人。）當然有口痕友話，見佢貼乜咪唔買咯，我想何必呢？睇得，自然信；睇完買對家，這種逆向思維，正如支持嗰隊，但金錢卻投向對家做對冲，我就做唔出。當然，利記躉今季肯長買對家作對，到目前為止，真係大豐收！紅軍喺本輪足總盃最強戲碼、又撞啱行正運嘅曼聯，死敵對峙，點會對你仁慈；何況曼聯下周中冇波打，相反利記聯賽補賽作客黑池，曼聯唔手軟，會唔會聽日先開到近4場第1次嘅[-1]呢？
蘋果波神
語錄：周六日出現大量廢波，一於盡量刪減，一日賭幾場，夠贏啦。