教協管理層換班，城大高級講師馮偉華成為第三代會長，張文光退居副會長，唔少人關心馮偉華明年會唔會出選立法會教育界。馮偉華噚日稱仍在考慮，強調教協一定會派人出選，明年4月會決定人選。
做教育界議員多年嘅張文光幾年嚟都話想交棒，馮偉華則話想有多啲時間教書同陪屋企人，所以十五十六，張文光順水推舟，「重視家庭係好，選民都鍾意選呢啲人」。馮偉華又稱如果自己唔出選，張文光應該會選多一屆。
馮偉華大仔在港大讀生物，細女讀新高中，太太係公務員，從政應無後顧之憂。華叔喺鬥爭中成長，佢亦唔輸蝕，細時在龍蛇混雜徙置區東頭邨長大，邨內童黨蝦蝦霸霸，佢夠膽企出嚟曉以大義，又試過應付有背景小巴佬，因此唔好以為佢一介書生就好好「蝦」。