年尾接年頭，每年呢段時間，總有兩樣嘢困擾打工仔，第一樣係交稅，第二樣係轉工。可能係下意識唔想交稅，所以敏妮今年居然罕有地唔見咗份稅單。不過，以往經驗，每年大概呢個時候都係deadline，唔想出唔到境，惟有打電話去稅局話收唔到稅單，請佢哋報個數交咗先，再補發一份稅單畀敏妮。
軟件工程師最吃香
稅唔交唔得，至於第二樣轉工問題，敏妮係diehard，暫冇轉工打算，希望老闆見字會表示一啲心意。不過，講起轉工，敏妮噚日睇網上《華爾街日報》，見到一個幾吸引嘅標題──2010最佳與最差職位。
以前望子成龍嘅父母，都希望子女做專業人士，最好係乜師物師，好似律師、工程師、會計師咁，時至今日，「師」繼續吃香，但做工程師唔係揀出入地盤嗰隻，要做就應該做軟件工程師。根據《華爾街日報》引述CareerCast.com發佈200個最好同最差職位調查榜，軟件工程師名列榜首。呢個調查係按照收入、工作環境、工作壓力、體質要求，同職業前景5個因素，對200個職位進行排名；並且基於美國勞工部同美國人口普查局嘅數據，以及研究人員自身嘅專業知識嚟評估。今年三甲排名，按序係軟件工程師、數學家、精算師。
其實，市場價值取決於供求，求過於供，自然有人願意出高價搵。隨住iPhone等smartphone同社交網站越趨普及，軟件工程師需求增加。敏妮朋友間公司之前都四圍搵軟件工程師，佢話家陣好多商場企業都搵人寫Apps，啲工程師大把freelance做，加上80後愛自由，寧願自己出去接job，所以佢走上大陸先搵到人。
有年輕人話，女友講明如果冇樓揸手就唔嫁，如果呢位仁兄識寫program，係一名軟件工程師，唔知佢女友會唔會加番啲分？
溫敏妮
http://wanmanli.com/blogs/