內地供港活豬拍賣價過去一季漲了20%，如此下去，唔使一年豬價就要累升一倍。但點升都唔及一幅1998年以34.5萬元買返嚟，12年後轉手賣1300萬元賺37倍嘅徐悲鴻大作《雙豬圖》，真係同豬唔同命，此豬不同彼豬，年複合回報率高達32%，勁過地球上大部份大師級基金。
賣家係平時成交水靜鵝飛、股價長期向下炒嘅實力建業（519），果然唔打得都睇得（起碼有幅畫睇吓），公司嘅實力在哪裏？去年底出售深圳平湖物業，售價1750萬元竟然蝕足767萬元，蝕賣當然入公司數，變成虧損，高揸低沽，似乎公司睇大陸樓嘅眼光比唔上睇畫，有理由懷疑，上市公司係為咗粉飾財務報表而忍痛善價而沽。
八八卦卦用咗些少時間睇過佢份年報，從來冇提及過上市公司有咁珍貴嘅珍藏，真係好想知道究竟佢手上仲有幾多珍品，反正家游資氾濫，古董名畫美酒價格水漲船高，老闆咁有眼光，隨時屋企或者辦公室牆上都可以用手指篤中一幅勁嘢，炒家都有藉口對佢重新估值。市場挑通眼眉，未有為佢賣咗一幅畫而吶喊，難得仲有三幾隻小豬嘜落叠，祝佢哋出入平安啦！
秤實力建業測實力
集團全職員工得16位，去年上半年才轉虧為盈，4766.6萬元利潤中，有6445.2萬元來自投資物業公平值增加淨額，即係話實際仲係蝕緊，連經營現金流都係負數。睇埋集團其他資產都係超豪級數，例如計劃喺BVI（英屬處女群島）同巴拿馬投資五星級度假村及遊艇村項目，仲有高爾夫球場及豪宅，就知班老細幾識嘆世界。
至於手上最貴重而能見度最高嘅物業，係全資擁有山頂施勳道3號施勳別墅，估值超過2億元，剛好同公司市值相若。不過BVI及巴拿馬項目未正式上馬，即係未有盈利貢獻，資產估值卻獲計入，未來就算獲批可按藍圖發展，然而錢從何來？上半年公司手頭現金只有240萬元，隨時連日常營運資金都好緊張。
胡孟青
作者為獨立股評人