金牌大風新老闆龐維仁，噚日聯同旗下部份歌手吳雨霏、鄧麗欣、雷頌德同RubberBand等搞記招，梁漢文同鄭中基等因有工作缺席。會上宣佈咗管理層名單，啱啱離職亞視嘅胡競英會加入，擔任PacificGlobalManagementAsia公司CEO。龐維仁又派定心丸，話公司資金充裕。
吸納優質藝人
龐維仁宣佈生咗個女，又話同朋友合資嘅PacificGlobalManagementAsia公司，有150億現金投資。講到金牌大風嘅新大計，龐維仁強調會有大量金錢投資，將金牌大風拓展成為全世界最大嘅藝人管理公司，目標係2013年旗下有100個藝人，而現時就有40幾人。
同時，金牌大風將有兩項收購，家已經收購咗歐洲最大模特兒公司Elite，龐維仁話：「我哋會發掘有潛質嘅新人，同搵啲有潛質嘅藝人。我哋亦會搬辦公室，加入藝人專區，仲會培育藝人嘅德、智、美。」龐維仁又話有同一啲藝人斟洽過檔，問佢會唔會考慮陳奕迅？佢話：「佢係好吸引嘅藝人，但聽到話想收五億，攞完獎再加五億（身酬），有啲挑戰性。」不過佢否認蔡衍明注資：「現時冇興趣有新股東，唔需要投資者。」
吳雨霏搵靚仔
吳雨霏同鄧麗欣唔怕有歌手加入分薄資源，仲對公司收購嘅Elite模特兒公司最有興趣，吳雨霏話：「我同咗Louis（龐維仁）講，希望可以搵啲靚仔模特兒同我拍MV，佢話OK，如果喺巴黎搵到兩個靚仔就好喇。」鄧麗欣希望可以學多種語言同出國語碟，RubberBand就話公司一直有資源做碟。胡競英話同亞視嘅糾紛，交咗畀律師處理，唔方便透露。
另外，金牌一哥梁漢文噚日喺荃灣出席活動時話，唔擔心公司人事變動，啱啱續約嘅佢話：「收咗公司咁多錢，有責任為公司賺錢。」梁漢文仲話想開個唱同出碟。
