你有壓力我有壓力，喺香港搭巴士似乎好大壓力。近日YouTube又有「新戲」上畫，呢齣《巴士阿婆》由主角第一身手機拍攝，被網友尊稱為「巴士惡師奶」嘅主角，元旦夜坐3B巴士去紅磡，無端端俾人侮辱，所以拍低罪證。
小朋友前爆粗
段片一開始就見到巴士上坐咗個婆婆同一位女士，阿婆開聲就話「唉，拖住兩隻狗上車」。聽真啲，原來阿婆講嘅「狗」係惡師奶兩個嘈喧巴閉嘅小朋友。俾人鬧係狗喎，唔嬲就假，一場罵戰就咁展開。
「細路仔邊個唔嘈o架，你唔毒啞佢？」「我話你細路仔嘈，我話你咩？」互轟一輪後惡師奶忽然出招，「你好×識教，喫蕉啦你！」罵戰升級為生果問題，「咩生果都有得食，你連蕉都冇得食」「蕉有咩唔好呀，係最靚嘅生果」「所以你咪成碌蕉咁囉！」雙方互轟近10分鐘先收聲。短片觀看次數高達10幾萬，唔食蕉食花生嘅網友對事件各有睇法，有人指惡師奶教壞細路，亦都有人覺得阿婆鬧人係狗冇禮貌。